Rydym yn falch i gyflwyno ein Cynllun Blynyddol ar gyfer 2025-26

Mae’r Cynllun hwn yn nodi ein blaenoriaethau ar gyfer y 12 mis nesaf. 2025-26 yw pedwaredd flwyddyn ein strategaeth bum mlynedd bresennol. Mae’r strategaeth honno’n parhau i fod yn hollbwysig, ac rydym ar y trywydd iawn i wneud hynny trwy gryfhau ein gwaith o gyflawni rhaglenni archwilio ymhellach a chynyddu ein heffaith a’n gwelededd.

Mae gwasanaethau cyhoeddus yn parhau i wynebu pwysau ariannol, galw a gweithlu enfawr. Er bod yn rhaid i gyrff cyhoeddus wneud eu penderfyniadau eu hunain ynghylch sut i fynd i’r afael â’r heriau hynny, mae archwilio cyhoeddus annibynnol yn amlygu cyfleoedd i wella gwerth am arian, ac yn cefnogi dulliau llywodraethu da a rheoli ariannol da, a gallant roi rhybudd cynnar o broblemau sy’n codi. Mae’r Cynllun Blynyddol hwn yn disgrifio sut rydym yn bwriadu gwneud hynny yn ystod y flwyddyn sydd i ddod gan roi’r wybodaeth a’r sicrwydd sydd ei angen ar y cyhoedd, y Senedd, ar y rhai sy’n gwneud penderfyniadau a’r dylanwadwyr ynghylch pa mor dda y mae arian cyhoeddus yn cael ei wario.

Mae maes mwyaf ein gwaith yn ymwneud ag archwilio cyfrifon dros 800 o gyrff cyhoeddus ledled Cymru. Trwy gyfnod pandemig COVID dirywiodd ein prydlondeb wrth gyflawni’r gwaith hwn. Gan weithio gyda’n cyrff archwiliedig, mae’n cymryd sawl blwyddyn i’r rhaglen waith fawr honno ddychwelyd i amserlenni a fodolai cyn y pandemig, ond rydym yn benderfynol o wneud hynny ac yn hyderus y byddwn yn llwyddo. Yn 2025-26, byddwn yn parhau â’r cynnydd a wnaed dros y ddwy flynedd ddiwethaf i ddwyn ymlaen y terfynau amser adrodd ar gyfer ein gwaith archwilio cyfrifon.

Ein nod hefyd yw gwella amseroldeb y gwaith archwilio perfformiad a gyflawnir gennym mewn cyrff GIG a llywodraeth leol unigol. Unwaith eto, rydym yn hyderus y byddwn yn gwneud hynny. Gyda llinynnau pwrs y wlad mor dynn, mae’n bwysicach nag erioed cael gwerth am arian o bob punt o wariant cyhoeddus. Yn ein rhaglenni astudiaethau lleol a chenedlaethol, ein nod yw canolbwyntio’n fanylach ar werth am arian drwy ddadansoddiad ariannol a chanlyniadau cryfach.

Yn ystod y blynyddoedd nesaf bydd Archwilio Cymru yn gweld cryn newid a chyfle. Yn 2026, bydd tymor wyth mlynedd yr Archwilydd Cyffredinol presennol yn dod i ben, a bydd Archwilydd Cyffredinol newydd yn cael ei benodi. Hefyd yn 2026, bydd etholiadau i Senedd estynedig. Yn ogystal â’r amgylchedd economaidd, cymdeithasol a gwleidyddol ehangach, gwyddom fod ein harchwiliadau, adroddiadau ariannol a thirweddau’r sector cyhoeddus yn datblygu’n gyson; yn gynyddol rydym yn eu gweld yr effeithir arnynt gan dechnolegau newydd, gofynion rheoleiddio cynyddol a disgwyliadau cyhoeddus o ran atebolrwydd y llywodraeth. Mae ein Cynllun Blynyddol ar gyfer 2025-26 yn ein gweld yn paratoi ein hunain ar gyfer y byd hwnnw sy’n datblygu.

Ni ellir cyflawni unrhyw un o’n hamcanion ar gyfer archwilio cyhoeddus o ansawdd uchel heb ein staff. Dros y flwyddyn sydd i ddod, byddwn yn parhau i ddarparu cynnig cyflogaeth rhagorol, hyblyg sy’n cefnogi llesiant cyflogeion ac amgylchedd gwaith sy’n annog cydweithio a gwaith o ansawdd uchel. Fel y gwnawn bob blwyddyn, rydym hefyd wedi adolygu ein fframwaith o ddangosyddion perfformiad allweddol a thargedau cysylltiedig, er mwyn sicrhau eu bod yn parhau i fod yn gwbl gyson â’n hamcanion a’u bod yn ddigon heriol.

Mae’r Cynllun Blynyddol hwn yn cwmpasu’r cyfnod llawn o’r 12 mis diwethaf o gyfnod Adrian yn dal y swydd Archwilydd Cyffredinol ac mae’n parhau i symud ymlaen tuag at gyflawni ein strategaeth bum mlynedd. Fel y bu ein nod drwy gydol ei gyfnod fel yr Archwilydd Cyffredinol, mae’n sicrhau bod Archwilio Cymru yn canolbwyntio ar ddefnyddio ei bersbectif a’i arbenigedd unigryw i sicrhau pobl Cymru bod arian cyhoeddus yn cael ei reoli’n dda, i egluro sut mae’n cael ei ddefnyddio, ac i ysbrydoli a grymuso’r sector cyhoeddus i wella.