Mae’r Cyngor wedi cryfhau ei fwriad strategol ar gyfer gweithio mewn partneriaeth, fel a welwyd yng Nghynllun y Cyngor a’r cymorth o ran arweinyddiaeth. Fodd bynnag, dim ond megis dechrau y mae’r broses o’i roi ar waith. Mae’r trefniadau Llywodraethu ar gyfer y ddwy bartneriaeth a adolygwyd yn eu lle, ond nid oes gan y Cyngor ddull corfforaethol o ymdrin â’i holl bartneriaethau. Nid oes ganddo ffordd gyson o’u diffinio, eu rheoli na’u goruchwylio. Bydd sefydlu fframwaith partneriaethau cymesur a chyson, gyda dealltwriaeth fwy eglur am adnoddau a deilliannau, yn helpu’r Cyngor i sicrhau ei fod yn cyflawni gwerth am arian ac yn cyfrannu’n effeithiol at amcanion strategol.